सल्बलाउने वस्तु (यमुना थापा)

हरेक सल्बलाउने वस्तु स्वार्थी छ,
हरेक सल्बलाउने वस्तु निष्ठुरी छ,
म स्वार्थी संसारको हिस्सा
म यो निष्ठुर संसारको टुक्रा
 म पनि सल्बलाउने वस्तु
म पनि स्वार्थी छु,

मलाई यो समयको मल्हम लगाउने मन थियो
तर
समयलाई थाहा नै भएन
समयले देख्नै सकेन
मेरो घाउ, मेरो घाउको पीडा

सबै सल्बलाउने वस्तु
सास भएर पनि जिउँदो देख्दिन आजभोली
हाँसेर पनि रोएको देख्छु आजभोली

म चिच्याउन चाहन्छु
म छटपटाउन चाहन्छु
तर,
म सभ्य पागल
मलाई चिच्याउने छुट छैन
म सभ्य बहुलाहा
मलाई छटपटाउने अधिकार छैन